Біздің балабақшада «Таза Қазақстан» республикалық экологиялық бастамасы аясында тәрбиеленушілердің қатысуымен іс-шара өткізілді. Аталған шараның негізгі мақсаты – балаларға қоршаған ортаны қорғаудың маңызын түсіндіру, табиғатқа деген сүйіспеншілігін арттыру және экологиялық мәдениетін қалыптастыру. Іс-шара барысында бүлдіршіндерге табиғатты аялау, қоршаған ортаны ластамау, тазалық сақтау туралы түсіндіру жұмыстары жүргізілді. Тәрбиешілер балалармен бірге табиғат туралы әңгімелер өткізіп, экологиялық тақырыпта ойындар ұйымдастырды. Сонымен қатар «Таза аула», «Табиғатты қорғайық», «Біз таза Қазақстан үшін!» атты танымдық сабақтар мен шығармашылық жұмыстар өткізілді. Балалар балабақша ауласын тазалауға белсене қатысты. Олар қоқыстарды жинап, ауланы ретке келтіруге көмектесті. Бұл жұмыстар балалардың еңбекке баулу, жауапкершілік сезімін арттыру, ұжымдық жұмысқа бейімдеу дағдыларын дамытуға зор ықпал етті. Шара барысында сурет салу байқауы ұйымдастырылып, бүлдіршіндер «Таза Қазақстан – жарқын болашақ» тақырыбында өз ойларын қағаз бетіне түсірді. Балалардың табиғатқа деген қамқорлығы мен шығармашылық қабілеттері ерекше көрінді. Осындай тәрбиелік мәні зор іс-шаралар арқылы біз өскелең ұрпақтың бойына табиғатты қорғау мәдениетін қалыптастырып, туған жерге деген сүйіспеншілікті арттыруды мақсат етеміз. Себебі табиғатты қорғау – әрбір азаматтың қасиетті борышы. Біздің балабақша ұжымы алдағы уақытта да «Таза Қазақстан» бастамасын қолдап, экологиялық бағыттағы жұмыстарды жүйелі түрде жалғастыра береді.
